Thursday, February 25, 2010

သမိုင်း ဂါရဝ
အောင်ဝေး
ဖေဖော်ဝါရီ ၂၅၊ ၂၀၁၀
ဆရာ အီကြာကွေး ဆုံးပါးကွယ်လွန်သွားရတော့ အားလုံးက သူ့ကို နှမြောတသ လွမ်းဆွတ်ပြီး ကျန်ရစ်ခဲ့ကြပါတယ်။
တိုက်ပွဲပျော်ကြီး
ဆရာအီကြာကွေးရေးခဲ့တဲ့ ဟာသတွေ၊ သရော်စာတွေဟာ ရယ်ရပြီးကွာ၊ ဆော်ရပြီးကွာဆိုပြီး ကလိထိုးရယ်ခိုင်းတဲ့ အသွားလွတ် ပုဂ္ဂိုလ်ရေးတိုက်ခိုက်တဲ့ စာတွေမဟုတ်။ သူ့ရဲ့စာတွေဟာ ပြည်သူတွေရဲ့ဘဝကို ထင်ဟပ်ဖော်ပြနေတယ်။ မတော်တာ၊ မတရားတာ၊ အမြင်မတော်တာတွေ့ရင် ဆရာကြီး ကွေး ကလောင်က မနေဘူး။
သူရှင်သန်ဖြတ်သန်းခဲ့တဲ့ နိုင်ငံရေးခေတ်အဆက်ဆက် စာပေသမိုင်းအဆက်ဆက် ဆရာအီကြာကွေးရေးခဲ့တဲ့ စာတွေ ပေတွေထဲမှာ ပြည်သူ့ကိုစော်ကားတဲ့၊ လူထုကိုဆန့်ကျင်ပြီး ဖိနှိပ်အုပ်ချုပ်သူကို ဖော်လံဖားတဲ့စာ တပုဒ်မှမပါ။ သူရေးခဲ့တဲ့ ဖိုက်တာ ဘောလုံးတို့၊ ခွပ်လိုက်ကြစို့ သူငယ်ချင်းတို့၊ ဘာအခုမှ ကြောက်ပါပြီလဲဆိုတာ အဖိနှိပ်ခံ၊ အောက်ခြေနင်းပြားတွေ ဘက်က ရှေ့နေလိုက်တဲ့ စာတွေ၊ ဖိနှိပ်သူကို မညှာတမ်း ဝေဖန်တိုက်ခိုက်တဲ့စာတွေပဲ။
ဆရာကွေးဟာ ‘အီကြာကွေး’ ဆိုပြီး ဟာသနဲ့ သရော်စာ စာရေးဆရာ မဖြစ်ခင် ဟိုအရင်တုန်းကတည်းက ‘ဓနုဖြူ ကျော်ထွန်း’ ဆိုတဲ့ ပြည်သူ့ဘက်က တိုက်ပွဲဝင်တဲ့ ကဗျာတွေရေးခဲ့သူပါ။ ၁၉၆၆ ခုနှစ်လောက်က ရှုမဝမဂ္ဂဇင်းမှာ ဓနုဖြူကျော်ထွန်း နာမည်နဲ့ရေးခဲ့တဲ့ သူ့ရဲ့ ‘တိုက်ပွဲပျော်’ ဆိုတဲ့ကဗျာဟာ ဒီကနေ့အထိ ထင်ရှားနေတုန်းပါပဲ။
‘ရှေ့ကဆီး၍
ခရီးလမ်းထဲ၊ သစ်ပင်လှဲမလား။
ရှေ့ကကန့်၍
အဟန့်အတား၊ ဆူးတွေထားမလား။
ယောက်ျားဟေ့နော်၊ တိုက်ပွဲပျော်
ကျွန်တော်တိုက်ရင်း တက်မှာပဲ’
အစဉ်အလာကောင်း
ဆရာအီကြာကွေး ကွယ်လွန်တဲ့အခါကျတော့ အများတကာထက် ပိုကြေကွဲ၊ ပိုဝမ်းနည်း ဖြစ်ကြတာက ကာတွန်းဆရာ တွေပါ။ လူကြီး ကာတွန်းဆရာတွေကလည်း ဆရာကွေးကို ချစ်ကြ ခင်ကြတာပဲ။ လူငယ်ကာတွန်းဆရာတွေကလည်း ဆရာကွေးကို ရိုသေလေးစားကြတာပါပဲ။
အဲဒီကာတွန်းဆရာတွေက မကြာသေးခင်က နှစ်စဉ်ကျင်းပမြဲ ဆရာကန်တော့ပွဲ လုပ်ကြပါတယ်။ ကနဦးကတော့ ကာတွန်း ဦးဖေသိန်း၊ ကာတွန်းဦးအောင်ရှိန်၊ ကာတွန်းသော်ကတို့ကို ကန်တော့ကြတာပါ။ နောက်တော့ ဆရာသော်က (အရိုင်း) ငယ်တဲ့သူက အရင်ကွယ်လွန်သွားတော့ ဆရာရွှေမင်းသား ကန်တော့ခံပုဂ္ဂိုလ်ထဲ ပါလာပါတယ်။
ဒီတကြိမ်မှာတော့ ဆရာဦးဖေသိန်းလည်း ကွယ်လွန်သွားပြန်တာမို့ ဦးအောင်ရှိန်နဲ့ ဦးရွှေမင်းသားတို့ ၂ ဦးပဲ ကျန်ပါတယ်။ ကန်တော့ပွဲနေ့က ဆရာဦးအောင်ရှိန် ကျန်းမာရေးကြောင့် မလာရောက်နိုင်တဲ့အတွက် ဆရာရွှေမင်းသား တဦးတည်းကိုပဲ ကန်တော့ခဲ့ကြရပါတယ်။
ဆရာရွှေမင်းသားက ဆရာဦးအောင်ရှိန်နဲ့စာရင် အများကြီးငယ်ရွယ်သေးတယ်လို့ ပြောရမှာပါ။ ဆရာအီကြာကွေးတို့၊ ဆရာရွှေမင်းသားတို့ဟာ ၆၀ ကျော် ၇၀ တန်းတွေပါ။ အခု ဆရာရွှေမင်းသားကို ကန်တော့ကြတယ်ဆိုတာက မြန်မာ့ ကာတွန်း သမိုင်းအစဉ်အလာ၊ ဆရာရွှေမင်းသားရဲ့ဝါနဲ့ သမ္ဘာကို ရိုသေလေးစားလို့ပါ။ အသက်အရွယ်ကြီးလို့ပါဆိုတဲ့ သက်သက်နဲ့ ဝတ်ကျေတန်းကျေ ကန်တော့တာ မဟုတ်ပါဘူး။
ဆရာရွှေမင်းသားဟာ (ဆရာဦးဖေသိန်း၊ ဦးအောင်ရှိန်၊ ဆရာသောကတို့လိုပဲ) ခေတ် အဆက်ဆက် ပြည်သူဘက်က ရပ်တည်ခဲ့တဲ့သူ၊ သူ့တသက်မှာ ဖိနှိပ်သူတွေဘက်ကလိုက်တဲ့ ကာတွန်းတကွက်မှ မရေးခဲ့ဖူးဘူး။ ဒါကြောင့် လူငယ်တွေက ချစ်ကြတာပဲ။
သဲသဲကွဲကွဲ အဖြေ
ကာတွန်းဆရာတွေရဲ့ ဆရာကန်တော့ပွဲပြီးလို့ ဘာကြာလိုက်လို့လဲ။ အသက် ၉၀ ကျော် ကာတွန်းဆရာကြီးတဦးရဲ့ နာရေးသတင်း ကြားလိုက်ရပါတယ်။ ဒီပုဂ္ဂိုလ်ကြီးကလည်း ခေတ်အဆက်ဆက် ကာတွန်းတွေရေးလာတဲ့ ပုဂ္ဂိုလ်ကြီးပါပဲ။ ဒါပေမယ့် နှစ်စဉ်ကျင်းပတဲ့ ကာတွန်းဆရာ ကန်တော့ပွဲမှာတော့ ကန်တော့ခံပုဂ္ဂိုလ်စာရင်းထဲ မပါပါဘူး။
အဖိနှိပ်ခံနဲ့ ဖိနှိပ်သူ တရားမှုနဲ့ မတရားမှု၊ ပြည်သူ့ဘက်နဲ့ အာဏာရှင်အစိုးရဘက်ဆိုတဲ့ ပဋိပက္ခတိုက်ပွဲ သဘောတရား ပေတံနဲ့ တိုင်းတာလိုက်ရင်တော့ ဘယ်သူက ကန်တော့ခံထိုက်တယ်၊ ဘယ်သူကတော့ အကန်တော့ မခံထိုက်ဘူးဆိုတဲ့ အဖြေက သဲသဲကွဲကွဲ ထွက်လာတာပါပဲ။
သမိုင်းက ဆုံးဖြတ်တာပါ။
(သရုပ်ဖော် - ကာတွန်းမောင်မောင်အောင်၊ ဘားမားတူဒေးဝက်ဆိုက်က တဆင့်ရယူပါတယ်)

Wednesday, February 24, 2010

Beyond Valentine's Day

ချစ်သူများနေ့  အလွန်
အောင်ဝေး

ကွေ့ရမယ့် မြစ် က မကွေ့ဘဲ
မကွေ့ရမယ့် တောင် က ကွေ့နေတယ်။
ကောက်ရမယ့် မိန်းမတွေက မကောက်ဘဲ
မကောက်ရမယ့် ယောက်ျားတွေက ကောက်နေတယ်။
လောကကြီး ဆန်းကြယ်။

ကမ်းပါးတစ်လျှောက်
သက်တံကို ဖြောင့်နေသူလည်း ရှိ။
တောင်ခြေမှာ
ကြောင်ရေချိုးသူလည်း ရှိ။
ပန်းခင်းကို
မြင်းစီး၍ နင်းသူလည်း ရှိ။
အချက်မသိ
ကြွက်ကို ခြူဆွဲပေးသူလည်း ရှိ။

နော်လီဇာဘင်ဆင်ကတော့
သေတဲ့အချိန်အထိ လှ သွားခဲ့တယ်။
မသေခင် ဘယ်သူတွေပုပ်နေသလဲ
ဧရာဝတီကသိတယ်။

မနေ့က ချစ်သူများနေ့ ။
ဒီကနေ့ မုန်းသူများနေ့လား။

ဖထီး (ပဒိုမန်းရှာ) က
ချစ်သူများနေ့မှာ လုပ်ကြံခံရတယ်။
လောကကြီး မတရား။

ကဗျာဆရာစောဝေက
ချစ်သူများနေ့ကဗျာ ရေးလို့ အကျဉ်းချခံရတယ်။
လောကကြီး မတရား။

ညီမလေး
အားမငယ်နဲ့
အနာဂတ်ကို အမှန်တရား စောင့်တယ်
မြားကိုသာ ဖြောင့်အောင်ပစ်ပါတော့။

တို့ အချစ်က
ဖက်ဆစ်ကို နိုင်မယ်။ ။

ဖေဖော်ဝါရီ ၁၅ ၊ ၂၀၁၀

Saturday, February 6, 2010

book review

လွမ်းသူရဲ့တေး

ပြည်ပကိုရောက်နေတဲ့ စာရေးဆရာ ကဗျာဆရာတွေထဲမှာ ဆရာမောင်သာရတို့ ဆရာ မောင်စွမ်းရည်တို့ ဆိုတာ ကျန်တဲ့ငယ်သူတွေက ဦးထိပ်ထားရ ရိုသေလေးစားရတဲ့ ပုဂ္ဂိုလ်တွေပါ။ သူတို့နှစ်ဦးစလုံး (၇၀) ကျော်တန်းတွေပါ။ ဆရာမောင်သာရက လာ့စ်ဗေးဂတ်မြို့မှာ နေပါတယ်။ ဆရာမောင်စွမ်းရည်က နယူးယောက်မြို့မှာ နေတာပါ။

နှစ်ဦးစလုံး အာရ်အက်ဖ်အေတို့ ဘီဘီစီတိုလို ရေဒီယိုတွေမှာ အသံလွှင့်ဆောင်းပါးတွေ လွှင့်နေကြပါတယ်။ ဆန်ဖရန်စစ္စကို အခြေစိုက် “မိုးမခ” မီဒီယာဝက်ဆိုက်တို့ လော့အိန်ဂျယ်လိစ် အခြေစိုက် “မန္တလေးဂေဇက်” ရတနာပုံနေပြည်တော် သတင်းစာတို့မှာလည်း စာရေးကြတဲ့အခါ ရေးကြသပေါ့။

ပြည်တွင်းမှာတုန်းကတော့ ဆရာမောင်သာရက လုံးချင်းဝထ္ထုတိုရေးသူပီပီ စာအုပ်အထွက်ကြမ်းခဲ့တဲ့ စာရေးဆရာပါ။ ခုပြည်ပမှာတော့ ကျနော်လက်လှမ်းမီသလောက် ဆရာမောင်သာရရဲ့ “ကျဉ်တုပ်ခံဝံ့ မခံဝံ့” ၀ထ္ထုကောင်းတအုပ်ပဲ ဘန်ကောက်အခြေစိုက် “ခေတ်ပြိုင်” သတင်းနဲ့ စာအုပ်တိုက်က ပြန်ထုတ်တာတွေ့ရပါရဲ့။
ဆရာမောင်စွမ်းရည်ကတော့ ပြည်တွင်းမှာ ကဗျာ၊ ၀ထ္ထုတို၊ စာပေဝေဖန်ရေး၊ စာစီစာကုံး စတဲ့ စာအုပ် ဆယ်အုပ် ကျော်ကျော်တော့ ထွက်ခဲ့ပါတယ်။ ပြည်ပရောက်မှတော့ ဆရာ မောင်စွမ်းရည်ရဲ့ “ဘာလဲဟဲ့ မောင်စွမ်းရည်” ဆိုတဲ့ ဆောင်းပါးပေါင်းချူပ် တအုပ်လဲ အရင်ကတွေ့ခဲ့ဖူးတာပါ။ ၂၀၀၇ တုန်းက ထွက်ခဲ့တာဖြစ်ပါတယ်။

အခု ၂၀၀၉ မကုန်ခင်မှာတော့ ပြည်ပရောက် မြန်မာ စာရေးဆရာ၊ ကဗျာဆရာတွေရဲ့ စာပေလက်ရာ တခုအနေနဲ့ ဆရာမောင်စွမ်းရည်ရဲ့ “မှိုင်းမှသည် မိုးထိအောင်” လို့ အမည်ပေးထားတဲ့ ကဗျာပေါင်းချူပ် စာအုပ်ထွက်ပေါ်လာခဲ့ပါပြီ။ ထုတ်ဝေသူက ၀ါရှင်တန်ဒီစီအခြေစိုက် “ဓူဝံ” စာပေပဲ ဖြစ်ပါတယ်။

ပြည်တွင်း ဖြတ်သန်းခဲ့ဖူးတဲ့ ထုတ်ဝေရေးလောက အတွေ့အကြုံအရဆိုရင်တော့ဖြင့် ပြည်တွင်းမှာက ကဗျာစာအုပ်တအုပ် ထုတ်ဖို့ဆိုတာ မလွယ်ကူလှပါဘူး။ ဒုလ္လဘပါပဲ စာဖတ်ပရိသတ် သိပ်မရှိတဲ့ အမြတ်အစွန်းမပြောနဲ့ ထုတ်လိုက်ရင် အရှုံးပြတဲ့ ပြောရရင်ဈေးကွက် သိပ်မ၀င်တဲ့ ကဗျာလုံးချင်း စာအုပ်တွေကို ဘယ်ထုတ်ဝေသူကမှ မထုတ်ချင်ကြပါဘူး။ လက်ရှောင်ကြပါတယ်။

(စောင်ရေ သိန်းချီပြီး ဆယ်ကြိမ်မက ပြန်ပြန်ရိုက်ရတဲ့ ဆရာမောင်စိန်ဝင်း(ပုတီးကုံး) ရဲ့ “သောကခြေရာ ရတနာ” ကဗျာစာအုပ်လိုမျိူးကတော့ ခြွင်းချက်ပေါ့။ မြန်မာပြည်မှာ စောင်ရေ သန်းချီပြီး ရိုက်ရတဲ့ ကဗျာစာအုပ်ကတော့ ဆရာကြီး ဒဂုန်ဦးထွန်းမြင့်ရဲ့ “သုံးဆယ့်ရှစ်ဖြာ မင်္ဂလာ” ကဗျာများ ပါပဲခင်ဗျာ)
ဆရာမောင်စွမ်းရည်အနေနဲ့ကတော့ ပြည်တွင်းမှာ ကဗျာ လုံးချင်းစာအုပ်က (၁) စိတြ (ဆရာကြည်အောင်နဲ့တွဲ၍) ၁၉၆၀။ (၂) အနီနှင့် အပြာ (အမျိူးသားစာပေဆုရရှိ) ၁၉၆၄။ (၃) ဟိုချီမင်း၏ အကျဉ်းထောင်ကပုလွေသံ (ဘာသာပြန်) ၁၉၆၄။ (၄) မန္တလေးမြို့ရဲ့ မနက်ခင်း ၁၉၇၁။ (၅) ဖိုးဝ နှင့် ဖိုးလှ(ကလေးကဗျာစု) ၁၉၉၉ - ဒါလောက်ပဲ ထွက်နိူင်ခဲ့တာပါ။

ဆရာမောင်စွမ်းရည် ပြည်ပကို ထွက်မလာခင် ပြည်တွင်းစာနယ်ဇင်းတွေမှာ ရေးခဲ့တဲ့ ကဗျာတွေက မနည်းပါဘူး။ နောက်ပိုင်းမှာ ဆရာမောင်စွမ်းရည်ရဲ့ ကဗျာစာအုပ် ထွက်မလာခဲ့ တော့ပါဘူး။ အခုပြည်ပကို ရောက်လာပြီး အချိန်နည်းနည်းရလာတော့မှ ဆရာမောင်စွမ်းရည်ရဲ့ ကဗျာစာအုပ်အသစ်ကို ကျနော်တို့ ဖတ်ခွင့်ကြုံရတာပါ၊ ဒါလည်းဒုလ္လဘပါပဲ။ ပြည်တွင်းမှာထုတ်ဝေခွင့် မရနိူင်တဲ့ ကဗျာတွေ အများဆုံးပါတဲ့ စာအုပ်ကို ပြည်ပမှ ထုတ်ရတယ်ဆိုတာကတော့ ထူးပြီး မဆန်းတော့ပေဘူးနော်။

ပြည်တွင်းမှာပဲ ထုတ်ထုတ်၊ပြည်ပမှာပဲထုတ်ထုတ် မြန်မာဘာသာစကားနဲ့ ရေးသားထုတ်ဝေလာတဲ့ စာအုပ်ဟာ မြန်မာစာပေဘဏ္ဍာသိုက်အတွက် ထည့်ဝင်မှု။ ယနေ့ မြန်မာစာပေသမိုင်းအတွက် စိုက်ထည့်မှု့ တခုပဲ မဟုတ်လား။ ဒီအတွက် ဆရာမောင်စွမ်းရည်ရဲ့ စာအုပ် (မှိုင်းမှသည် မိုးထိအောင်)ကို ကျနော်တို့စာဖတ်သူတွေ စာရေးသူတွေက လှိုက်လှိုက်လှဲလှဲကြို ဆိုကြရမယ်။

ဆရာမောင်စွမ်းရည်ရဲ အခုစာအုပ်သစ်မှာ ထူးခြားချက်ကတော့ “ကြည်ညိုဂုဏ်ပြု ကဗျာစု” လို့ ရည်ညွှန်းဖေါ်ပြထားတာပါပဲ။ ကြည်ညိုလေးစားထိုက်တဲ့ ပုဂ္ဂိုလ်တွေကို ဂုဏ်ပြုကဗျာ ဖွဲ့ထားတာမို့ ဒီစာအုပ်ထဲမှာ ရုပ်ပုံလွှာအဖွဲ့အနွဲ့ဆန်တဲ့ ကဗျာတွေချည်းပဲ ရွေးဖတ်ကြရမှာပါ။ ဒါကြောင့် ဒီစာအုပ်ထဲမယ်တော့ ဆရာမောင်စွမ်းရည်ရဲ့ ရကန်အရေးအသားဆန်တဲ့ သရော်တဲ့ ဝေဖန်တဲ့ (ဥပမာ- အင်တာနက်သူရဲကောင်းများကဗျာတို့ နယူးယောက်ကျောက်ကပ်ဆေးနဲ့ ကဗျာတို့လို) သီးခြား ကဗျာကောင်း အများကြီးကိုတော့ ဖတ်ခွင့်မရှာဘူးပေါ့။ အဲ့ဒီသီးခြားကောင်းတာတွေကို သီးသန့်စုစည်းပြီး စာအုပ်ထုတ်ပါဦးလို့ ဓူဝံကိုအောင်ကျော်ဦးနဲ့ ဆရာစွမ်းတို့ကို တိုက်တွန်းချင်ပါတယ်)။

မြန်မာစာပေမှာ ရုပ်ပုံလွှာ အဖွဲ့အနွဲ့ ဆိုတာကတော့ အထုပ္ပတ္တိစာပေ အမျိူးအစားထဲမယ် ပါပါတယ်။ ဆရာဒဂုန်တာရာရဲ့ “အောင်ဆန်း(သို့)အရိုင်း” တို့ “ဗဟိန်း(သို့)ကဗျာ” တို့စတဲ့ လူကိုလေ့လာခြင်း ဆောင်းပါးတွေဟာ ရုပ်ပုံလွှာအဖွဲ့အနွဲ့တွေပါ။ တနည်း အတ္ထုပ္ပတ္တိဟန် ရသစာတန်းတွေပါပဲ။

ဒီလိုပဲ အတ္ထုပ္ပတ္တိဟန် ၀ထ္ထုတို့ ဆိုတာလည်း တချိူ့ စာရေးဆရာတွေ ရေးကြတာရှိပါတယ်။ (ဥပမာ-ဆရာညီပုလေးရဲ့“ မြေးသူကြီး” ဆိုတဲ့ စာအုပ်က အတ္ထုပ္ပတ္တိဟန် ၀ထ္ထုပါ။ ၀ထ္ထုစာအုပ်ပါပဲ။ ဆရာကြီးရွှေဥဒေါင်းရဲ့ “တသက်တာအတွေးအခေါ်မှတ်တမ်း” ဆိုရင် ၀ထ္ထုဟန်အတ္ထုပ္ပတ္တိလို့ ရည်ညွှန်းနိူင်ပါတယ်။ ဆရာကြီးက သူ့အတ္ထုပ္ပတ္တိကို ရသနဲ့ဝထ္ထုလို ဇတ်လမ်းဖွဲ့ ရေးထားတာကလား)
ပြောရရင် ဆရာမောင်စွမ်းရည်ရဲ့ အခု“မှိုင်းမှသည် မိုးထိအောင်” ကဗျာစာအုပ်ထဲက ကဗျာအားလုံး( စုစုပေါင်း ၈၅ ပုဒ်)ဟာ ကဗျာအဖွဲ့ခံပုဂ္ဂိုလ်တွေရဲ့ ရုပ်ပုံလွှာပါပဲ။ တချိူ့ လျှပ်တပြက် ရုပ်ပုံလွှာ။ တချို့ ကန်လန့်ဖြတ်ဘေးတိုက် ရုပ်ပုံလွှာ။ တချို့ ခဲခြစ်ကောက်ကြောင်းရုပ်ပုံလွှာ။ တချို့ တကြောင်းဆွဲ။ တချို့ စုတ်ပြားခတ် ရုပ်ပုံလွှာ။ တချိူ့ ပန်းချီလိုဆိုရင်တော့ တချို့ကဗျာတွေက Portrait ဖြစ်မယ်။ တချို့ကဗျာတွေကိုတော့ sketch လိုပဲ ဆိုချင်တယ်။ တချိူ့ကဗျာတွေဟာ ဆေးရောင်စုံ တက်ခနီကာလာ၊ တချိူ့ကဗျာတွေကတော့ အဖြူအမည်း ဘက်လက်ခ်အင်ဝှိုက်၊ ရုပ်ရှင်လို ပြောပြန်ရင် - တချို့ကဗျာတွေကတော့ Long Shot။ တချို့ကဗျာတွေက Close up ဆိုပါတော့။ ကဗျာတွေကတော့ ရသအစုံစုံ ဒဿန အဖုံဖုံပါပဲ။ တချို့ အနံ့တသင်းသင်း တချို့အဆင်းတလှလှ။

ဒီစာအုပ်မှာ ဖွဲ့သူနဲ့ အဖွဲ့ခံသူ ပုဂ္ဂိုလ်နှစ်ဦးနှစ်ဖက်ရဲ့ အဆက်အစပ်က အင်မတန် အရေးကြီးပါတယ်။ ဖွဲ့သူမောင်စွမ်းရည် ဘာလဲ ဘယ်လဲ၊ အဖွဲခံပုဂ္ဂိုလ်တွေ ဘာလဲ ဘယ်လဲ၊ ဖွဲ့သူကတော့ အခုနေမှာ ပြောရရင် သူပုန်ကဗျာဆရာပါပဲ။ (အနုပညာသူပုန်စိတ် ဆိုတာကတော့ ပြည်တွင်းမှာကတည်းက ကျနော်တို့ ကဗျာဆရာတွေ ရှိပြီးသားပါ)။

နအဖ စစ်အာဏာရှင် စနစ်ကို ခြေဆုံးခေါင်းဖျား ပုန်ကန်နေတဲ့ ကဗျာဆရာ။ Exile Poet ။ ဒါဖွဲ့သူရဲ့ ရပ်တည်ချက်ပါ။ အစိုးရ ဆန့်ကျင်ရေးသမား ဒီမိုကရေစီ လှုပ်ရှားရေးသမားဖြစ်နေတာကလဲ ကဗျာဆရာရဲ ဂုဏ်ပုဒ်ဖြစ်နေပါပြီ။

ဆရာမောင်စွမ်းရည် ကဗျာဖွဲ့ ဂုဏ်ပြုတဲ့ ပုဂ္ဂိုလ်တွေကို ကြည့်လိုက်ပြန်တော့ ယောမင်းကြီးဦးဖိုးလှိုင်၊ ဆရာကြီးသခင်ကိုယ်တော်မှိုင်း၊ ဦးဖေမောင်တင်၊ ဇော်ဂျီ ၊ မင်းသုဝဏ်၊ ဗိုလ်ချူပ်အောင်ဆန်း၊ ဆရာမောင်ထင်၊ ဆရာတော်ဦးသောဘိတ (ရွှေကိုင်းသား)၊ လူထုဦးလှ လူထုဒေါ်အမာ၊ ဂျွန်တကာမီ (ဂျပန်)၊ ဦးမောင်မောင်တင်( မဟာဝိဇ္ဇာ)၊ ဒေါက်တာသန်းထွန်း၊ တင်မိုး၊ မောင်ပေါက်စည် (မန်းတက္ကသိုလ်)၊ လူထုစိန်ဝင်း၊ လေးမောင်(မြင်းခြံ)၊ နီမောင်၊ ဒဂုန်တာရာ၊ပါရဂူ၊ ဗန်းမော်တင်အောင်၊ မြသန်းတင့်၊ ကြည်အေး၊ ဗိုလ်မှုးချူပ်ကျော်ဇော၊ ဒေါ်ခင်မျိူးချစ်၊ ဗိုလ်ချူပ်ကတော် ဒေါ်ခင်ကြည်၊ ဒေါ်အောင်ဆန်းစုကြည်၊ ဗိုလ်ချူပ်ကြီး(ဟောင်း)သူရဦးတင်ဦး၊ (ဦး)၀င်းတင် (ဟံသာဝတီ)၊ ကြေးမှုံဦးသောင်း (အောင်ဗလ)၊ ကိုဖုန်းသစ်၊ မောင်အောင်ပွင့်၊ ငြိမ်းသစ်၊ မင်းကိုနိူင်၊ ထက်မိုး၊ ဇာဂနာ၊ ရုပ်ရှင်သရုပ်ဆောင်ကျော်သူ၊ ရဲဘော်ဘိုဇံ၊ ဖဒိုမန်းရှာလဖန်း၊ မာမာအေးနဲ့ ကာယကံရှင်၊ ဆရာမောင်စွမ်းရည်ရဲ့ မိဘနှစ်ပါး (ဦးသိန်းဖေ၊ ဒေါ်တင်ကြည်)။

ကဗျာဖွဲ့ခံပုဂ္ဂိုလ်တွေဟာ မြန်မာ့နိူင်ငံရေး တလျှောက်မှာ မြန်မာစာပေရေစီးကြောင်း တလျှောက်မှာ၊ သူ့ခေတ် သူ့အနေနဲ့သူ ကြီးကျယ်မြင့်မြတ်ခဲ့ကြတဲ့သူတွေပါပဲ။ အဖွဲ့ခံပုဂ္ဂိုလ်တွေ ဘက်က သမိုင်းဝင်ပြီးသားပါပဲ။

ကျနော်တို့ ဒီစာအုပ်မှာ အကဲဖြတ်ကြရမှာက သမိုင်းဝင်ပုဂ္ဂိုလ်တွေကို ဂုဏ်ပြု ရေးဖွဲ့ထားတဲ့ကဗျာတွေဟာ သမိုင်း ၀င် မ၀င်ဆိုတဲ့ ကိစ္စပါပဲ။ တရုတ်ခေါင်းဆောင်ကြီးလဲဖြစ် ကဗျာဆရာလဲဖြစ်တဲ့ မော်စီတုန်းက သူ့အနေနဲ့ “တော်လှန်တဲ့သမိုင်းကို တော်လှန်တဲ့ ခံစားမှုနဲ့ ကဗျာရေးတာပါပဲ …” လို့ပြောဖူးပါတယ်။ ပထမအချက်အနေနဲ့က ဆရာမောင်စွမ်းရည်ရဲ့ ဒီကဗျာတွေမှာ တော်လှန်တဲ့ ခံစားမှုအမြင် အပြည့်အ၀ရှိနေတာပါပဲ။

ကျနော်တို့ဟာ စာပေ (ရသစာပေ)နဲ့ သမိုင်းကို မော်ကွန်းတင်ကြတယ်ဆိုရာမယ် အနုပညာမြောက် “တင်” နိုင်ဖို့ဆိုတာကလဲ သိပ်ကိုအရေးကြီးလှတဲ့ အချက်ပဲ။ ကျနော်တို့ ရေးဖွဲ့ မော်ကွန်းတင်တဲ့ သမိုင်း(လူထုသမိုင်း)ဟာ ရသမြောက် ပရိသတ်ရင်ထဲကို စွဲမြဲရောက်ရှိသွားရတယ်။ ဒီပေတံနဲ့ တိုင်းမယ်ဆိုရင်လဲ ဆရာမောင်စွမ်းရည်ရဲ့ အခုစာအုပ်ထဲက ကဗျာတွေမှာ အနုပညာမြောက်မှုကို တွေ့ရမယ်။ တော်လှန်တဲ့ အမြင်လဲရှိတယ်၊ အနုပညာမြောက်မှုကိုလဲ တွေ့ရတယ် ဆိုရင် ဒါပြည့်စုံနေပါပြီ၊ ဒါမျိူးကို တော်လှန်စာပေ၊ တော်လှန်အနုပညာလို့ခေါ်တာပါပဲ။

ကဗျာရေးဖွဲ့သူရဲ့ ခံစားမှုအတွေးအခေါ်က တနည်း ရင်ခုန်သံဒဿနက တော်လှန်ရေး ကျရမယ်၊ ပြည်သူ့ဖက်က ပြတ်ပြတ်သားသားရပ်တည်ရမည်၊ ဒီမိုကရက်တစ်ဖြစ်ရမယ်၊ ဒီနေရာ ပြောစရာရှိတာက ဒီလိုတော်လှန်ရေးကျ ပြည်သူ့ဘက်ကရပ် ဒီမိုကရက်တစ်တဲ့ အတွေးအခေါ် ဒဿနတွေ ရင်ခုန်သံ ခံစားမှုတွေနဲ့ ရေးဖွဲ့တိုင်း ကဗျာကောင်းဖြစ်လာမယ်ရယ်လို့တော့ မျှော်မှန်းလို့ မရဘူးဆိုတာပါပဲ။

ကဗျာဆရာရဲ့ ကဗျာဖွဲ့ပုံဖွဲနည်း အလင်္ကာအလုပ်ကလဲ အရေးတကြီး လိုအပ်နေသေးမင့်ပဲ ဟာကိုး။ ကဗျာဆရာက ပရိသတ်ရင်ထဲ အသည်းထဲရောက်အောင် ရသမြောက် ရေးနိူင် သီနိူင် ဖွဲ့နိူင်ဖို့ အတတ်ပညာ အားထုတ်မှုပြုဖို့ လိုပါသေးတယ်။

ဆရာမောင်စွမ်းရည်ဟာ ၀ါရင့် သမ္ဘာရင့် ကဗျာဆရာကြီးတဦးပါ၊ နိုင်ငံရေးခေတ်မျိုးစုံ၊ စာပေခေတ် မျိုးစုံကိုလည်း ဖြတ်သန်းလာခဲ့ပြီးပါပြီ။ အခုစာအုပ်ထဲက ကဗျာတွေကို အထူးတလည် ညွှန်းဆိုနေစရာ ချီးမွမ်းနေစရာ မလိုအပ်လှပါဘူး။ ပရိသတ်ကိုယ်တိုင်ကသာ စာအုပ်ရှာကြည့်ပြီး ခံစားကြည့်ကြပါတော့။

ဒီကဗျာစုဟာ ဆရာကြီးသခင်ကိုယ်တော်မှိုင်း (မှိုင်း) ကနေပြီး ဆရာဦးတင်မိုး (မိုး) အထိ ဆရာမောင်စွမ်းရည် ဖြတ်သန်းခဲ့ရတဲ့ သမိုင်းခေတ်တွေထဲက ပုဂ္ဂိုလ်တွေရဲ့ အကြောင်းကို ဖွဲ့ထားတာ ဆိုပေတဲ့ တကယ်က ဒီကဗျာတွေဟာ မြန်မာ့နိူင်ငံရေးသမိုင်း၊ အမျိူးသားဒီမိုကရေစီလှုပ်ရှားမှုသမိုင်း၊ လူထုတော်လှန်ရေးသမိုင်းကို ကောင်းကောင်း ထင်ဟပ်နေတယ်ဆိုတာပါပဲ။

ဆရာကြီးသခင်ကိုယ်တော်မှိုင်းက တခေတ်တခါတုန်းက သခင်စိုးနဲ့ သခင်သန်းထွန်းတို့ နှစ်ယောက်ကို ရည်ညွှန်းပြီး (ဂရုဏာဒေါသောနဲ့)၊
“ ထမ်းပိုးတည့်တည့် ထမ်းခဲ့ကြတဲ့
စိုး နဲ့ သန်း” လို့ ရေးဖွဲ့ခဲ့တာကို ဆရာမောင်စွမ်းရည်က ဒီစာအုပ်ထဲမှာ
“ကိုယ်ကျိူးမငဲ့စတမ်း
နထိုးနဲ့ ဇဂျမ်းဆီက
မိုး နဲ့ စွမ်း” ဆိုပြီး ဖွဲ့ထားပါတယ်။ (တင်မိုးနဲ့ မောင်စွမ်းရည်ကို ရည်ညွှန်းတာပါ)
ဒီစာအုပ်ထဲမှာ အကျုံးဝင်ပေမဲ့ ဆရာမောင်စွမ်းရည်က သူ့ရဲ့အကျော်ကြားဆုံး အကောင်းဆုံး လက်ရာဖြစ်တဲ့ “အမေခေါ်သံ” ကဗျာကိုတော့ ပြန်ထည့်မထားပါဘူး။

ဆရာမောင်စွမ်းရည်ဟာ ခေတ်ကို မျက်ခြေမပြတ်ဘူး ၊ အမိမြေကို မမေ့လျော့ဘူး။ ဖိနှိပ်သူ အစိုးရ အကြောင်းလဲ သိတယ်။ အဖိနှိပ်ခံ ပြည်သူတွေ အကြောင်းလဲ သိတယ်။ ဝေးခရီးကပေမဲ့ အရေးကြီးရင် သွေးစည်းတယ်။ ဒီကဗျာကို ဖတ်ကြည့်လိုက်ပါ။

ဒီမိုဂါထာ
ငရဲလားချင်
စစ်ထဲဝင်။
ကုသိုလ်ယူချင်
ကျော်သူနဲ့တိုင်ပင်။
ကြောက်မွေးပါ
ဇာဂနာနဲ့ နှုတ်။
တနေ့ သုံးခါ
ရွတ်ဆိုပါ
ဂါထာ ဤ သုံးပုဒ်။ ။ ( ၂၀၀၇ အောက်တိုဘာ ၆)

ဒါဟာ ရွှေဝါရောင်တော်လှန်ရေးကြီးပြီးစမှာ ရေးလိုက်တဲ့ ကဗျာပါပဲ။ ဒီနေ့အထိ ဆရာမောင်စွမ်းရည်ဟာ တိုင်းပြည်နဲ့ လူမျိုးအတွက် ကဗျာတွေ မပြတ် ရေးနေဆဲပါ။ အခုစာအုပ်ထဲက ကဗျာတွေအပြင် ဆရာမောင်စွမ်းရည် ရေးခဲ့တဲ့အခြားကဗျာတွေပါ အားလုံးဟာ ဘယ်အပေါ်မှာ အခြေခံတာလဲဆိုရင်တော့ အဖြေက တခွန်းတည်းပါပဲ။ အဲဒါ “အိမ်လွမ်းစိတ်” ပဲ။

နည်းနည်း ထပ်ပြီး ပြောမယ် ဆိုရင်တော့ “အိမ်လွမ်းစိတ် အမှန်တရား” ပါပဲ။
အင်္ဂလိပ်ကဗျာဆရာ ရှယ်လီရဲ့ “ငါတို့ရဲ့ အကောင်းဆုံးတေးတွေ ဆိုတာ၊ အဆွေးဆုံးအတွေးကို ပြောပြတဲ့ တေးတွေပေါ့” ဆိုတဲ့ စာသားကို ကိုးကားပြီး ပြောရမယ် ဆိုရင်တော့ ဆရာမောင်စွမ်းရည်ရဲ့ ကဗျာတွေဟာ အလွမ်းဆုံးအတွေးကို ပြောပြတဲ့ တေးတွေပဲ မဟုတ်ပါလား။
လွမ်းသူရဲ့ တေး၊ လွမ်းတေး ပေါ့။
လွမ်းတေး မဆုံးပါစေနှင့် ဆရာစွမ်း ခင်ဗျား။ ။

(ဒီဇင်ဘာ ၂၈၊ ၂၀၀၉)