Saturday, December 16, 2017

ချ စ် လို့ေ ရး တဲ့ က ဗျာ ( ၂ )

 

ဒီ နံရံမှာ
ဘယ်တော့မှ အမြစ်မတွယ်တော့ဘူး။
ဘဝက
တိုက်ကပ်ပန်းလို မလန်းဘူး။အသက်ရှင်ရတာ
သမိုင်းမကွေးရုံတစ်မယ်
ကိုယ့်ရင် ကိုယ်အကွဲခံပြီး
သိမ်ငယ်ရတယ်။

ထမင်းတစ်လုတ်
နှင်းတစ်ဆုပ် တဲ့
မဟုတ်သေးပါဘူး
တစ်ခုခုတော့ မှားနေပြီထင်ပါရဲ့။

ကိုလွဏ်းဆွေ ရယ်
မဲဆောက်မှာ ဖြစ်ဖြစ်
မစ်ရှီဂန်မှာ ဖြစ်ဖြစ်
အမြစ်က
ဒေါ်အောင်ဆန်းစုကြည်ဆီမှာ ကျန်ရစ်တာဗျ။

ကျနော် မညာပါဘူး
ချစ်တယ်။

အချစ်အတွက် များများမလို
မြောက်ဒဂုံ အိမ်ရှေ့က
ရေနုတ်မြောင်းကလေးထဲ
ကန်စွန်းခင်းလေးတွေ
စိမ်းနေသေးတယ်ဆိုရင် လုံလောက်ပါတယ်။

လောကမှာ
ချစ်လို့ ထွက်ပြေးရတဲ့သူတွေလည်း
မနည်းတော့ပါဘူးလေ။ ။

ေ အာ င်ေ ဝး
(ဒီဇင်ဘာ ၁၄၊ ၂ဝ၁၇)

design by Than Htay Maung

0 comments: