Thursday, February 12, 2009

အဘ၏ အုတ်ဂူ၌ ပူဇော်ခြင်း

အောင်ဝေး

(ဆရာကြီး မင်းသုဝဏ် ရာပြည့် သို့)

အို … ဟေမန္တ

ညည်းသံတစ

သည်းထန်လှပါလား။

နှင်းမြူကြားက

အဘအုတ်ဂူ၊ ညအဖြူမှာ

ဘယ်သူ ငိုကြွေးနေတာလဲ။

ညရောင်၊ လရောင်

ကြယ်ရောင် ပြိုးပြောက်၊ နှင်းသောက်အုံ့မင်

သုဿန်လွင်မှာ

သင် ဘာကြောင့် ငိုသနည်း။


လေညှင်းမြေ့မြေ့

တွန်းဝှေ့ဝှေ့၏၊ ဝေ့ဝေ့၀ိုက်ဝိုက်

ပဲ့တင် ရှိုက်ဆဲ

ရှိုက်ကြီးတငင် ငိုပြန်ပြီ။


ဖယောင်းဆီမီး

ညီးညီးလျှံလျှံ၊ ဖိတ်အန် လက်လက်

အုတ်ဂူထက်မှာ

အို … မျက်ရည်တွေနဲ့ပါလား။


အလွမ်းကြီးစွ

ပွင့်စည်းနီနီ၊ သင်းလှိုင်ကြည်သော

နှင်းဆီမွှေးမြ၊ ဆွေးတဲ့ညမှာ

ဘ၀နာကျင်သူ သင်လော။


ငိုရှိုက်သံလည်း

တယံမလပ်၊ မပြတ်ညစဉ်

သင်မော်ကွန်းထိုး

အဘိုးရဲ့ အုတ်ဂူ၌။


သင် မည်သူနည်း

ငိုကြီးချက်မ၊ ည ည ည မှာ

အဘကို ဂုဏ်ပြုသူလား။


ဒို့အဘရဲ့

မာနမဲ့လျှင်း၊ သိက္ခာရှင်းသည့်

ချစ်ခြင်းမေတ္တာ၊ ဉာဏ်ပညာကို

ခါခါဦးခိုက်၊ ကန်တော့ထိုက်စွာ

သင့်၌ အခွင့် ရှိသလော။


တခေတ် တခေတ်

ဖက်ဆစ်တောထ၊ အဓမ္မကို

အဘ သူပုန်၊ ထခဲ့တုံ၏

“သူပုန်အဘ”၊ နာမခေါ်တွင်

သင် ရှိခိုးသူလား။


အဘနာမည်

ကမ္ဘာတည်အံ့

သင်သည် ဓမ္မ၀ါဒီလား။


ရာဇ၀ံသ

ထုံးမမျှ၍၊ အဘဆန့်ကျင်

အာဏာရှင်ကို

သင်ကော ဆန့်ကျင်ရဲသူလား။


အဘ၀ိညာဉ်

ရာဇ၀င်မှာ

ကောင်းကင်မြေကြီး၊ လင်းယုန်စီး၍

ခရီးသွင်သွင်

သင်အတူ လိုက်ပါလိုသူလား။


အဘညွှန်ပြ

“တကသ” ရဲ့

အာဂ ခွပ်ဒေါင်း၊ သမိုင်းကြောင်းကို

ကောင်းကောင်း သင်သိသူလား။


အဘဆရာ

ကဗျာက၀ိ၊ ခေတ်၏ကြေးမုံ

အလုံးစုံကို

သင် ယုံကြည်၍ပေလား။


အိုးဝေကမွေး

ခေတ်က ကျွေးနှင့်

“အရေးတော်ပုံ”

အဘဂုဏ်ကို၊ ခိုလှုံဝင်စား

မွေးဖွားတဖန်

သင် ရှင်ပြန်ထမြောက်လို၍လော။


သင် ဘယ်သူလဲ

မြူခြေမှေးမှေး၊ ညရေးရေးမှာ

သွေးနှင့် မျက်ရည် တိုင်တည်သူလား။


အုတ်ဂူတ၀ိုက်

နှင်းဖြိုက်ဖြိုက်ကြွေ၊ လေတဝှေ့ညင်း

တိတ်ဆိတ် မင်းမှာ

အလို … ငိုရင်း သီချင်းဆိုသံပါလား။


လောကငြိမ်သက်

အိပ်မက် ထင်ထင်၊ ကြားအံ့မြင်မိ

အသင် မည်သူနည်း။


ငိုရှိုက်လျက်ပင်

အို … ရုတ်တရက်၊ လှိုင်းတချက်ပုတ်

လျှို့ဝှက်သော ည

အဘဂူရင်း၊ မြစ်တမင်းမှာ

စီးသော သွေး၊ လွမ်းသူ့တေးကို

အဝေးက ငါတို့၊ ကြားရဘိသို့။

အဝေးက ငါတို့၊ မျက်ရည် စို့။

အဝေး၌ ငါတို့၊ မေတ္တာပို့။

လွတ်လပ်ပါဖို့၊ ငြိမ်းချမ်းဖို့။

(၂၀၀၄ သြဂုတ် ၁၄ တွင် ထူးအိမ်သင်၊ ၁၅ တွင် ဆရာကြီး မင်းသုဝဏ် ရှေ့ဆင့် နောက်ဆင့် ကွယ်လွန်သည်။ ဆရာကြီးနှင့် ငှက်ကို ရေဝေးသုဿန်တွင် ဂူချင်းယှဉ်၍ မြှုတ်နှံထားပါသည်။ စာရေးသူ)




Related Posts:

  • Insein Prison - Our Next Boycott Headquarter Normal 0 false false false MicrosoftInternetExplorer4 !-- /* Font Definitions */ @font-face… Read More
  • old scent in the pastအတိတ်ရဲ့ ရနံ့ဟောင်းများအရှင်လတ်လတ်ကြီးကိုပေးဆပ်ခဲ့ရအတိတ်ရဲ့ ရနံ့ဟောင်းများပဲလေ။မလိုအပ်ပါဘဲဇာတ်ညွှန်းတွေ ပြန်ပြန် ခွဲကြဖလင်ပေ တစ်စမျှမရိုက်နိုင်ကြတဲ့ ရု… Read More
  • အဘ၏ အုတ်ဂူ၌ ပူဇော်ခြင်း အောင်ဝေး (ဆရာကြီး မင်းသုဝဏ် ရာပြည့် သို့) အို … ဟေမန္တ ညည်းသံတစ သည်းထန်လှပါလား။ နှင်းမြူကြားက အဘအုတ်ဂူ၊ ညအဖြူမှာ ဘယ်… Read More
  • Aung Way - Special Poem 3ပျားအုံခံစားမှု အထူးကဗျာ - ၃ အောင်ဝေး မေ ၂၆၊ ၂၀၀၉ ဟေ့ကောင်သွေးကြောင်နေတဲ့ ကောင်ဘေးရှောင်။အခုအချိန်လူတိုင်းအင်းစိန်ထောင်ရှေ့ ရောက်နေတာ ထမင်းမြိန်… Read More
  • poem for May 18, 2009 ၂၀၀၉ မေလ(၁၈)ရက်နေ့  နံနက်အင်းစိန် အကျဉ်းထောင်ရှေ့ တွင်မြန်မာ ပြည်သူများ စုဝေး ရွတ်ဆိုရန်အထူးကဗျာအောင်ဝေးဒေါ်အောင်ဆန်းစုကြည် (ချက်ချင်းလွှတ်)၂မတရားတဲ့ ဥ… Read More

0 comments: