Letters from Michigan - 15

မစ်ရှီဂန်မှပေးသောစာ(၁၅)


ဆန်ဖရန်စစ္စကို Alcatraz အကျဉ်းထောင်ဟောင်း နောက်ခံဖြင့် တွေ့ရသော ကဗျာဆရာ အောင်ဝေး (ဓာတ်ပုံ-မိုးမခ)

- - - နအဖ စစ်အုပ်စုနဲ့ ပူးပေါင်းသွားတဲ့ သစ္စာဖောက်တွေ တွေ့နိုင်သလို၊ နအဖ တပ်မတော်ထဲကနေ ပြတ်ပြတ် သားသား ရုန်းထွက်ပြီး ပြည်သူ လူထုနဲ့ပူးပေါင်း တိုက်ပွဲဝင်ကြတဲ့ သူရဲကောင်းတွေလည်း တွေ့နိုင်တာပဲ - - -

မိတ်ဆွေကြီး ကိုဒေါင်း-

ကျန်းခံ့သာလို့ မာပါစ။ ဧရာဝတီ မြစ်ကြီးလည်း အေးမြညင်သာ စီးပါစ။ ဒီမှာတော့ မစ္စစ္စပီမြစ်ကြီးက တငြိမ့်ငြိမ့် စီးလျက်ပါ။ မြစ်တစ်မြစ်မှာ၊ နှစ်ခါရေမိုး၊ မချိုးနိုင်ဘူး- ဆိုတဲ့ ခေါမ အဘိဓမ္မာ ဆရာကြီး ဟီရာကလိတပ်စ်ရဲ့စကား၊ ကိုဒေါင်းလည်း ကြားဖူးပါတယ်။ ဒီစကားကို ပြန်သတိရလိုက်တော့ ကျနော်လည်း အခုလိုအတွေးပေါက်သွားမိတယ် ကိုဒေါင်းရေ။

ခေတ်တစ်ခေတ်တည်းမှာ ကျနော်တို့လည်း နှစ်ခါ ကျွန်ဖြစ်မခံနိုင်ဘူး။ ဟုတ်တယ်၊ ဒီအတွေးပဲ ကိုဒေါင်း။ ဖက်ဆစ်စနစ်ဆိုး၊ စစ်အာဏာရှင် ခေတ်မျိုးထဲမှာ ကျနော်တို့ပြည်သူတွေ စစ်ကျွန်ဘ၀ ရောက်နေရတယ်။ ဘယ်သူမှ ဒုက္ခနွံနစ်၊ စစ်ကျွန်ခေတ်မှာ လူရာဝင်ချင်ကြတာ မဟုတ်ပါဘူး။

လူဆိုတာ ဘ၀မှာ တစ်ခါပဲ သေရတယ်။ နှစ်ခါ မသေဘူး။ ငှက်ဆိုတာ ပျံရင်း သေတယ်။ လူက ကြံရင်း သေရမယ်။ ကျနော်တို့ ပြည်သူတွေဟာ စစ်သံဖနောင့်အောက်က လွတ်မြောက်ဖို့ ကြံစည် ကြိုးစားရင်း၊ ရုန်းကန်ရင်း သေကြတယ်။ ကျနော်တို့ ငိုရင်း မသေဘူး။ တိုက်ရင်း သေမယ်။ ခေတ်တစ်ခေတ်တည်းမှာ ကျနော်တို့ နှစ်ခါ ကျွန်ဖြစ် မခံနိုင်ဘူးကိုဒေါင်း။

ဒီတော့ အခုလို သေရေး ရှင်ရေးတမျှ အရေးကြီးလာတဲ့ အချိန်မျိုးမှာ ကျနော်တို့ ပြတ်သားဖို့ လိုပြီ။ ပြတ်သားတဲ့ ဆုံးဖြတ်ချက်၊ ပြတ်သားတဲ့ သဘောထား၊ ပြတ်သားတဲ့ မျှော်မှန်းချက်တွေကပဲ တိုက်ပွဲကို ရဲရဲ ခေါ်နိုင်တာပါ ကိုဒေါင်း။ ဒါကြောင့် အဓိက အကျဆုံး အနေနဲ့ ကျနော်တို့ရန်-

ရွှေဝါရောင် တော်လှန်ရေး အတွေ့အကြုံအရ ပြောရရင် ရန်-ငါ မပြတ်လို့၊ သံဃာ အသတ်ခံရတာပဲ မဟုတ်လား။ ကိုယ့်ရှေ့မှာ ဘုံရန်သူက မားမားကြီး ရှိနေတာကို မမြင်တဲ့ လူတွေကလည်း မမြင်ကြဘူး။ ဘုံရန်သူကို မမြင်နိုင် ဖြစ်နေတော့ ဘုံရန်သူရဲ့ ထောင်ချောက်ကိုလည်း မမြင်မိကြတော့ဘူးပေါ့။

ကိုဒေါင်းကြီး၊ နအဖ စစ်အစိုးရရဲ့၂၀၁၀ ထောင်ချောက်ကိုတော့ ကျနော်တို့ ပြည်သူတွေ သေနင်္ဂ ဗျူဟာမြောက် ဖောက်ထွက်ကြရတော့မယ်။ ကျနော်တို့ အဆုံးသတ် တိုက်ပွဲခေါ်ရတော့မယ်။ တိုက်ပွဲဆိုတာ ရှိတယ်။ ရန်သူ ဆိုတာ ရှိမယ်။ ရန်သူရှိရင် မိတ်ဆွေလည်း ရှိမှာပဲ။

အခြေခံ အကျဆုံး သဘောတရား အနေနဲ့ပြောရရင် ရန်-ငါစည်း၊ မိတ်-ရန်စည်း ဆိုတာနဲ့ ပတ်သက်လို့ ပထမသဘောထားက- ကိုယ့်ရန်သူရဲ့ ရန်သူဟာ ကိုယ့်ရဲ့ မိတ်ဆွေပဲ ဆိုတဲ့ အချက်။

ဒါဟာ ဘာကိုပြောချင်တာလဲ ဆိုတော့ ဘုံရန်သူကို ဆန့်ကျင်ဖို့၊ ဘုံရန်သူကို တိုက်ခိုက်ဖို့ ကျနော်တို့ဟာ ဘုံရန်သူကို ဆန့်ကျင် တိုက်ခိုက်နေတဲ့ အင်အားစုတွေ အချင်းချင်း ကျယ်ပြန့်စွာ မဟာမိတ်ပြုရမယ် ဆိုတဲ့ သဘောပါပဲ။

ဘုံရန်သူ၊ ဆိုပါတော့ နအဖကို ဆန့်ကျင် တိုက်ခိုက်နေတဲ့ အင်အားစု တစ်ခုနဲ့တစ်ခု၊ ကျနော်တို့တစ်ဦးနဲ့တစ်ဦး အယူအဆ၊ အတွေးအမြင် တူချင်မှ တူမယ်။ သဘောထား ထပ်တူထပ်မျှ ကျချင်မှ ကျမယ်။ ဒါ အရေးမကြီးပါဘူး။ ကျနော်တို့ဟာ ကိုယ်နဲ့မတူတာကို လက်ခံပေးနိုင်တဲ့၊ နားလည် အသိအမှတ်ပြုနိုင်တဲ့ စိတ်ထား ရှိဖို့ပဲ လိုတယ်။ ဒါကို ဒီမိုကရက်တစ်ဖြစ်တယ် လို့ ဆိုတာပဲ မဟုတ်လား။

ကျနော်တို့ဟာ တိုက်ပွဲကို ဘယ်လိုနေရာမှာ၊ ဘယ်လို ပုံသဏ္ဌာန်နဲ့ ဘယ်အချိန်မှာပဲ တိုက်တိုက်၊ ဘုံရန်သူကို ဦးတည် တိုက်ခိုက်နေတယ် ဆိုရင် ကျနော်တို့ အချင်းချင်းဟာ ရဲဘော်ရဲဘက်တွေပဲ၊ မဟာမိတ်တွေပဲ။ ဒီတော့ ကျနော်တို့ ဘုံရန်သူကို မျက်ခြည်မပြတ်နဲ့။ ဘုံရန်သူရဲ ၂၀၁၀ ထောင်ချောက်ကို မျက်ခြည်မပြတ်နဲ့။ ကိုယ့်ရန်သူရဲ့ရန်သူဟာ ကိုယ့်ရဲ မိတ်ဆွေပဲ ဆိုတဲ့ သဘောထားကို လက်တွေ့ နယ်ပယ်မှာ ကျနော်တို့ ကျယ်ကျယ် ပြန့်ပြန့်အသုံးချနိုင်ဖို့လိုပြီ ကိုဒေါင်း။

နောက်တစ်ချက်၊ ရန်-ငါစည်း၊ မိတ်-ရန်စည်းနဲ့ ပတ်သက်လို့ ဒုတိယ သဘောထားက- ထာဝရ မိတ်ဆွေ မရှိ၊ ထာဝရ ရန်သူ မရှိ၊ ထာဝရ အကျိုးစီးပွားပဲ ရှိတယ် ဆိုတဲ့ အချက်။ ဒါကတော့ ရှင်းပါတယ်။ ထာဝရ အကျိုးစီးပွား ဆိုတာက လူထု အကျိုးစီးပွား၊ ပြည်သူ့ အကျိုးစီးပွားကို ဆိုလိုတာပါပဲ။ အဲဒီ ပြည်သူလူထု အကျိုးစီးပွား ပေတံနဲ့ တိုင်းတာလိုက်တဲ့ အခါကျတော့၊ NLD က ခွဲထွက်ပြီး နအဖ စစ်အုပ်စုနဲ့ သွားပူးပေါင်းတဲ့ သစ္စာဖောက်တွေ၊ ရှစ်ဆယ့်ရှစ် မျိုးဆက် ကျောင်းသား အမည်ခံပြီး နအဖ စစ်အုပ်စုနဲ့ ပူးပေါင်းသွားတဲ့ သစ္စာဖောက်တွေ တွေ့နိုင်သလို၊ နအဖ တပ်မတော်ထဲကနေ ပြတ်ပြတ် သားသား ရုန်းထွက်ပြီး ပြည်သူ လူထုနဲ့ပူးပေါင်း တိုက်ပွဲဝင်ကြတဲ့ သူရဲကောင်းတွေလည်း တွေ့နိုင်တာပဲ မဟုတ်လား။

နိုင်ငံရေးမှာ မိတ်ဆွေကနေ ရန်သူဖြစ်သွားတာမျိုး၊ ရန်သူကေ နမိတ်ဆွေ ဖြစ်လာတာမျိုးဟာ ဖြစ်တတ်တဲ့ သဘာဝပါပဲ။ ဒါပေမဲ့ အခုလို သေရေး ရှင်ရေးတမျှ အရေးကြီးနေတဲ့ အချိန်မျိုးမှာ ကျနော်တို့ဟာ ရန်သူကို မိတ်ဆွေဖြစ်အောင် မလုပ်နိုင်ရင်တောင်မှ၊ကိုယ့်ရဲ့မိတ်ဆွေဖြစ်သူကိုတော့ ရန်သူဘက် ပါမသွားအောင် ဂရုစိုက်သင့်တယ် မဟုတ်လား။

ကျနော်တို့မှာ ပြည်သူလူထု အကျိုးစီးပွားပဲ ရှိပါတယ်။ မည်းမည်းမြင် ရန်သူထင်တာက နအဖပါ။ ကျနော်တို့ မဟုတ်ပါဘူး။ NLD အပါအ၀င် ကျနော်တို့ အားလုံးဟာ ဒီအချိန်မှာ ဘုံရန်သူကို ရင်ဆိုင်ဖို့ ကျယ်ပြန့်စွာ မဟာမိတ် ပြုထားတဲ့ ဒီမိုကရေစီ တပ်ပေါင်းစုကြီး ဖြစ်နေရမယ် မဟုတ်လား ကိုဒေါင်း။

အားလုံးကို သတိရလျက်-
အောင်ဝေး

(၄-၂၈-၁၀)

(ဤအသံလွှင့်ဆောင်းပါးကို ကဗျာဆရာ စောဝေ မလွတ်မီက လွတ်လပ်သည့် အာရှအသံ www.rfa.org/burmese က ထုတ်လွှင့်ခဲ့ပြီး ဖြစ်သည်။)