Wednesday, June 4, 2008

appeal to the burmese people

ပြည်သူသို့ ပန်ကြားချက်
၁။ ကျနော်သည် ပြီးခဲ့သည့် ၂၀၀၇ ခုနှစ်၊ သြဂုတ်- စက်တင်ဘာ မြန်မာ့ဒီမိုကရေစီ တောင်းဆိုမှု ရွှေဝါရောင် တော်လှန်ရေးကြီးတွင် သံဃာလှုပ်ရှားမှု ဦးစီးကော်မတီနှင့် အနီးကပ် ပူးတွဲ၍ ဦးဆောင် ပါဝင်ခဲ့ပါသည်။
၂။ ၂၀၀၇ ခုနှစ်၊ စက်တင်ဘာလ (၂၆)ရက်နေ့မှစ၍ စစ်တပ်က ဆန္ဒပြသူများကို အကြမ်းဖက် နှိမ်နင်းဖြိုခွင်း လာသည့်အခါ ကျနော် ရန်ကုန်မြို့ထဲတွင် တနေရာပြီး တနေရာ ပြောင်းရွှေ့၍ တိမ်းရှောင် ပုန်းအောင်း နေခဲ့ရ ပါသည်။
၃။ အစိုးရအကြမ်းဖက်ဝါဒ (State Terrorrism) အောက်တွင် ကြာရှည် ပုန်းအောင်၍ မရနိုင်တော့သည့်အ တွက် ၂၀၀၇ ခုနှစ် အောက်တိုဘာလ (၉)ရက်နေ့တွင် ကျနော် ရန်ကုန်မြို့မှ တိတ်တဆိတ် ထွက်ခွာလာခဲ့ ပါသည်။
၎။ ထိုင်းနိုင်ငံအတွင်းသို့ ကျနော် ၂၀၀၇ ခုနှစ်၊ အောက်တိုဘာလ (၁၃)ရက်နေ့တွင် ရောက်ရှိခဲ့ပါသည်။
၅။ ကျနော်သည် တက္ကသိုလ်ကျောင်းသားဘ၀တွင် ၁၉၇၆ မှိုင်းရာပြည့် အရေးအခင်း၌ တကြိမ်၊ ကဗျာဆရာ ဘ၀တွင် ၁၉၈၉ ဒေါ်အောင်ဆန်းစုကြည်၏ ဧရာဝတီတိုင်း ခရီးစဉ်၌ တကြိမ်၊ ၁၉၈၉ အာဇာနည်နေ့ အရေးအ ခင်း၌ ဒေါ်အောင်ဆန်းစုကြည် အထိန်းသိမ်းခံနေရစဉ်၌ တကြိမ် စုစုပေါင်း (၃)ကြိမ် နိုင်ငံရေး ပုဒ်မ(၅)ဖြင့် ထောင်ကျခံခဲ့ရပါသည်။၆။ ယခု ကျနော် တိုင်းပြည်ကို စွန့်ခွာလာခဲ့ခြင်းမှာ (လွတ်လပ်မှု ဆုံးရှုံးနေသော) တိုင်းပြည်ကို ပြန်လည် ရလို သောကြောင့် ဖြစ်ပါသည်။
၇။ ပြည်ပတွင် ရောက်ရှိနေထိုင်စဉ် ကျနော်သည် မပြီးဆုံးသေးသော အမိမြေ ဒီမိုကရေစီတော်လှန်ရေးအ တွက် ...
(က) ပြည်တွင်းပြည်ပ နိုင်ငံရေးအင်အားစုများနှင့် လက်တွဲ၍ စစ်အာဏာရှင်စနစ် ဖြုတ်ချရေးနှင့် …
(ခ) ပြည်တွင်းပြည်ပ ဥပဒေပညာရှင်များနှင့် တိုင်ပင်၍ စစ်အစိုးရနှင့် အပေါင်းအပါများအား လူထုခုံရုံးတင် ပြစ်ဒဏ်စီရင်နိုင်ရေးတို့ကို ဆက်လက်၍ အားသွန်ခွန်စိုက် ဆောင်ရွက်သွားမည်ဟု ကတိပြုပါသည်။
၈။ ယခုအချိန်တွင် ကျနော်တို့နိုင်ငံ၏ သေရေးရှင်ရေး အဓိကပြဿနာမှာ ဘုံရန်သူ (နအဖ စစ်အစိုးရ)ကို အမြစ်ပြတ် ချေမှုန်းရေး ဖြစ်ပါသည်။
၉။ ယနေ့လူထုတိုက်ပွဲတွင် ‘ဘက်’ နှစ်ဖက်သာ ရှိပါသည်။ တဖက်မှာ ဒေါ်အောင်ဆန်းစုကြည်ဘက်ဖြစ်၍ ကျန်တဖက်မှာ နအဖစစ်အုပ်စုဘက် ဖြစ်ပါသည်။ ကြားမရှိပါ။
၁၀။ အထူးသဖြင့် စစ်အစိုးရနှင့် အပစ်အခတ် ရပ်စဲထားသော တိုင်းရင်းသား လက်နက်ကိုင် အဖွဲ့အစည်းများ၊ တပ်မတော်အတွင်းမှ ဒီမိုကရေစီ လိုလားသော တပ်မှူးတပ်သားများ၊ ပြည်သူ့အခွန်စား ၀န်ထမ်းများ၊ ထို့အပြင် မြန်မာနိုင်ငံ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ၊ ဘယ်ဘက်က ရပ်မလဲ။ ကြားနေ၍ မရတော့ပါ။ ပြတ်သားဖို့ လိုပါပြီ။
၁၁။ ဒေါ်အောင်ဆန်းစုကြည်သည် ကမ္ဘာကပင် အသိအမှတ် ပြုထားရသော မြန်မာ့ဒီမိုကရေစီခေါင်းဆောင်၊ လူထုခေါင်းဆောင် ဖြစ်ပါသည်။ နအဖ စစ်အစိုးရသည် သံဃာသတ်သော သာသနာဖျက် ဖက်ဆစ်များ ဖြစ်ပါသည်။ ဒေါ်အောင်ဆန်းစုကြည်အား ဆန့်ကျင်သူများသည် နအဖ ဖက်ဆစ်များနှင့်အတူ မြန်မာ့လူထု၊ ကမ္ဘာ့လူထုများ၏ မြေမြှုပ်သင်္ဂြိုဟ်ခြင်းကို မလွဲမသွေ ခံရပါလိမ့်မည်။
၁၂။ ယနေ့ မြန်မာ့တော်လှန်ရေးသည် အဆင့်နှစ်ဆင့်ကို စနစ်တကျ ကူးပြောင်းသွားရပါမည်။ ပထမအဆင့်မှာ စစ်အာဏာရှင်စနစ်ကို အပြီးအပိုင် ဖြုတ်ချပြီး ဒီမိုကရေစီအစိုးရ တည်ဆောက်ရန်နှင့် ဒုတိယအဆင့်မှာ တိုင်းပြည် ပြန်လည်ထူထောင်ရန် ဖြစ်ပါသည်။ ထို ဒုတိယအဆင့်သို့ ရောက်မှ တိုင်းရင်းသားအရေး၊ ပြည်ထောင်စုအရေးကို ငြိမ်းချမ်းစွာ ညှိနှိုင်းအဖြေရှာရန် ဖြစ်ပါသည်။ ယခုအချိန်တွင် ဒီမိုကရေစီ ရရှိရေးသည် ပထမဖြစ်ပါသည်။
၁၃။ လွတ်လပ်မှုရှိလျှင် တရားမျှတမှုသည်လည်း သူ့အလိုလို ရှိလာပါလိမ့်မည်။ လွတ်လပ်ပြီး တရားမျှတလျှင် ငြိမ်းချမ်းရေးသည် အာမခံချက် ရှိလာပေမည်။ သို့ဖြစ်၍ တိုင်းရင်းသား ပြည်သူလူထုအပေါင်းသည် လွတ်လပ်မှုအတွက် မဆုတ်မနစ် ညီညီညွတ်ညွတ် ဆက်လက် တိုက်ပွဲဝင်သွားကြပါရန် အလေးအနက် တိုက်တွန်းနှိုးဆော်လိုက်ပါသည်။
- စစ်အာဏာရှင်စနစ် မုချကျဆုံးရမည်။
- ဒီမိုကရေစီအရေးတော်ပုံ မုချအောင်မြင်ရမည်။
အောင်ဝေး (မြန်မာနိုင်ငံ ကဗျာဆရာ)
၁၉-၃-၀၈

0 comments: